- An der Klass
-
Éier et an de Gaart geet, ka vill am Klassesall mat de Kanner beschwaat ginn.
· D'Kanner vun Ufank u mat abannen: Uleeë vum Gaart, Thema, Plangen, Auswiel a Kaf vum Som...
· Sécherheets- a Verhalensreegele festleeën, zum Beispill: net mat dem Gaardegeschir am Grapp lafen, op déi aner Kanner oppassen, d'Aarbechtsgeschier mat aneren deelen, botzen an ewechraumen, eng Charte ausschaffen, e Poster erstellen ...
· Déi geleeschten Aarbecht virun der ganzer Klass presentéieren
· E Gaardentagebuch pro Klass féieren
· Eng Tafel am Gaart opstellen a benotzen (Aarbechte gemaach, nach ze erleedegen…)
· Theme festleeën, zum Beispill: 1 Haaptthema fir de ganze Gaart, 1 Thema pro Parzell oder 1 Thema pro Klass
· De Gaart no baussen opmaachen: Partnerschaften agoen, zum Beispill Gaart an Heem, Elterevereenegung; Verkaf vun Planzen am Fréijoer, Erntedankfest, gemeinsaamt Iessen…
- Am Gaart
-
Fir datt d'Aktivitéit am Gaart gutt ofleeft a Spaass mécht, mussen d'Aufgabe gutt preparéiert sinn.
· A klenge Gruppe schaffen
· Kloer Missiounen am Viraus festleeën
· Reegelméisseg an de Gaart goen, net ze vill pedagogesch plangen (nëmmen e puer Geméisplanzen ubauen)
Hei e puer Beispiller vu Beruffer an Aktivitéiten déi d'Kanner am Gaart kënnen ausprobéieren:
Grupp 1 – Gaardereporter; Gaardentagebuch ausfëllen: Foto, Beschreiwung vun der Aktivitéit, Wieder, Interview, Beobachtung vum Gaart am Laaf vum Joer …
Grupp 2 – Insektesafari: Beobachtung vun de Liewewiesen am Gaart, Beschreiwung, Bestëmmung…
Grupp 3 – Gäertner: saisonal Aktivitéit, d .h. séien, planzen, Onkraut rappen, nätzen…
Grupp 4 – Artisten: Schëlder bastelen a beschrëften, Land-Art, Gaardenexpo organiséieren…
Grupp 5 – Botanisten: Planz vum Dag sichen a virstellen (Geméis, Wëllplanz…)
Grupp 6 – Kach: eppes aus dem Gaart preparéieren an zesumme genéissen, zum Beispill Téi, Kraiderdipp, réit Geméis…
Loosst iech Zäit fir de Feedback vun de verschiddene Gruppen. - An der Schoul
-
Fir datt de Léiergaart e Succès gëtt, sollten sech d'Enseignanten, déi mat hirer Klass am Gaart wëllen aktiv sinn, am Viraus zesummesetzen an dës Punkten duerchdiskutéieren.
· E Gaardegrupp grënnen· Déi 4 W-Froe beäntweren: Wie mécht Wat Wou a Wéini?
· E Léiergaardeplang zesummen opstellen: pedagogescht, zäitlecht a gäertnerescht Plangen
· D'Entretiensaarbechten an de Vakanzen plangen, eventuell aner Partner mat abezéien
· Aktivitéite vum Hierscht bis an den nächsten Hierscht plangen
· E Gaardentagebuch (online) opmaachen
Un éischter Platz kënnt d'Pedagogie am Gaart, duerno eréischt déi gäertneresch Noutwendegkeeten.
