Lycée technique de Bonnevoie

Eise Schoulgaart – e Projet fir d’Schüler op eis Ëmwelt an Ernährung opmierksam ze maachen

De Grondgedanke fir e Schoulgaart an eisem Lycée unzeleeën war, den Unterrecht vun de Naturwëssenschaften no baussen ze verleeën an doduerch d’Schüler fir d’Natur ze begeeschteren.

De Schüler soll d’Méiglechkeet kréien handlungsorientéiert, praktesch a mat alle Sënner d’Saisonen dobaussen ze erliewen. Well hien hëlleft de Schoulgaart selwer ze betreien, gesäit hie wéi d’Geméis an d’Uebst gezillt gëtt. Hie muss sech beweegen, plangen, mam Gaardegeschier richteg ëmgoen, sech dem Wieder upassen, sech këmmeren, an der Equipe schaffen, Verantwortung droen, Gedold hunn, experimentéieren an a Kaf huelen dat eppes net geléngt.

E besonnescht Erliefnes ass da fir dat zeidegt Uebst a Geméis an och d’Gewierzer kënnen ze recoltéieren, ze richen an ze schmaachen. Esou kann dem Schüler zousätzlech nach e Grondwëssen iwwert e gesond Iesse vermëttelt ginn.

D’Gaardenaarbecht gëtt awer och dem Schüler d’Méiglechkeet am an iwwert dem Buedem enger Onmass un Déieren ze begéinen a kennen ze léieren. Ausserdeem soll d'Aarbecht an eisem Schoulgaart och d'Méiglechkeet ginn op verschidde Beruffsausbildungen am Gaardeberäich hinzeweisen.

All Erfarungen solle schlussendlech derzou bäidroen dat déi Jonk eng positiv Relatioun zur Natur entwéckelen a respektvoll mat hirer Ëmwelt ëmginn.